أيمن البرعي يكتب : حوار مع متأسلم

أيمن البرعي يكتب : حوار مع متأسلم

# إنت كإخوانى أو بتحبهم طالع تتظاهر ليه وتأيد رئيس مبيعرفش يتكلم وكل خطاباته وأفعاله مجرد هرتلة وحوارات مساطب ، بتأيد رئيس بإختصار ضحك علينا بإسم الدين وجاب قروض ربوية مخالفه للدين . رئيس تاجر هو وجماعته بكل ماهو حق من أجل باطل يبغونه

@ عشان مرسي يرجع تاني وأعبر عن رفضي الانقلاب العسكري لأن دا رئيسي والرئيس الشرعي للبلاد  اللي أعرفه واللي إنتخبته ولازم يكمل مدته ، فيها إيه لما تسيبوه يكمل مدته الناس إنتخبته يعمل اللي هو عايزه ، ومحدش ليه عنده حاجه ولا يقدر يسأله ولا يحاسبه غير لما مدته تنتهي بعد مالشعب إختاره دا معاه حصانه دستورية وشعبية.

# إنت إما مغيب أو مشوفتش السخط والغضب الشعبي يوم 30-6 اللي حصل لو إنقلاب عسكري فهو بتأييد شعبي ولو ثورة فهي بتأييد جيش برضو يعني خلاص جماعتكم ورئيسكم إنتهو للأبد وعلى رأيكم موتو بغيظكم :D وزمن الرئيس اللي معاه حصانه ومحدش يقدر يحاسبه إنتهى بسقوط مبارك في 25 يناير.

@ لا الشرعية والدستور الشرعية الشرعيه وبعدين إحنا رئيسنا منتخب والدستور منتخب والشرعيه وإحنا الأغلبيه شرعيتنا ورئيسنا بيصلي الشرعيه وحافظ القرأن والشرعيه رئيس ملتح ومتدين وبيصلي كل جمعه في المسجد شرعيتي وهيقيم دولة الخلافة بلابلابلا الشرعية ورغي كتير عن الدين والشرعية...

# شرعيتك فطيرك الشرعيه بتسقط بسقوط الدم وإنتو اغتالتو وقتلتو شباب الثورة والنائب العام الملاكي بتاعكم قيد قضايا جيكا والحسيني والجندي ضد مجهول غير الشباب اللي إعتلقلتوهم وحولتوهم لمحاكمات عسكريه..!!

بالنسبه للدستور سلقتوه على مزاجكم وبإختصار دستور باطل غير إن فيه مواد تسمح بعزل رئيس الجمهوريه في أي ظروف مشابهه ليوم 30- 6 بطرق كتيردستورية وشرعية وإقعدو في بيوتكم طالما بتحترمو الدستور لأن فيه مواد عن التظاهر وقطع الطرق متناقضه وضد اللي بتعملوه ..!! ، غير قانون التظاهر بتاعكم اللي بيمنع التظاهر بدون تصريح وبيمنع الإقتراب من المنشئات الحيويه.

@ مش مقتنع بالكلام دا وكله كذب وتضليل أنا هنزل ادافع عن الشرعيه وارفض حكم العسكر والانقلاب العسكري والمنقلبين على الدستور والشرعيه يسقط يسقط حكم العسكر CC-CC مرسي رئيسي...

# نعم ياخويا انت أهبل يلا ولا أمك عبيطه مش إنت يامعرض اللي قياداتك رفضو هتاف يسقط حكم العسكر وأهانو ست البنات لما إتسحلت ورئيسك كرم طنطاوي وعنان وزرعتو الوقيعة بين شباب الثورة وبعض أفراد الجيش وإتلونتو على كل لون وركبتو كرسي السلطة بالمكر والخداع يامنافقين..!! إنت بتاخد فيها ياض؟؟!!

@ لا مباخدش واتكلم بأسلوب أحسن من كدا ياليبرالي ياكافر تعرف إيه إنت عن الدين انت مش هتعرف اكتر من ( الشيخ ...... والشيخ ....... ومولانا .....)

دي أمريكا نفسها ضد الانقلاب

# إنت مبسوط بأمريكا وكلك فخر يابو أمريكا الشعب حط عليكو انتو وأمريكا ويلا روح الإعتصام بتاعك بس أنصحك متستفزش رجالة الجيش وتضرب عليهم خرطوش ويكون ردهم عليك قاسي ويردعوك إنت واللي معاك وتطلعو تعيطو وتولولو على الفضائيات أنا هتعاطف مع جيش بلدي ومش هتعاطف معاكم لأنكم الطرف الظالم والجاني والمستفز والأقل وطنية.

@ إتقي ربنا إنتابتفرح بموتنا ماهي دي أخلاق الليبراليين والعلمانيين والشيوعيين والمعارضين أمثالك وإن شاء الله قتلاكم في النار وقتلانا في الجنة ، مصيركم جهنم وبئس المصير

# إيه المسميات والمصطلحات المضلله دي ياإبن الـ.. وبعدين زعلان ليه قتلاكم في الجنة ونعيمها من حور عين ولؤلؤ ومرجان وقتلانا في النار وعذابها المفروض تبقى مبسوط وتعمل حفله.

@ بتتريق على كلام ربنا دا بدل ماتتعاطف معانا وتتعامل مع الموقف بإنسانية ومتخليش كراهيتك للإخوان تخليك ساكت على اللي بيحصل؟؟

# ياجاهل دا كلامك مش كلام ربنا ..!!عايزني أتعاطف معاكم تاني وأنا متأكد إنكم همج وخوارج على باطل

لايلدغ المؤمن من جحر مرتين .. مش هتعاطف معاكم بإختصار لأنى عارف إنتو على إيه و متأكد إنكم مستفزين وبتبدأو بالعنف والإهانه والبادي أظلم ، مات الكلام.