قعد تلاتين سنه في الحكم يبوس ويحضن في الخمسين واحد اللي مستنيينه قدام باب الطيارة ....

الرئيس مرسي أثناء زيارته للصين

عــجبتني قوي مؤسسة الرياسة لما طلعت بيان مبدئي بخصوص زيارة مرسي للصين و قالت فيه إنه الصين قدمت لمصر قرض ميسر 200 مليون دولار ومنحة لا ترد 70 مليون دولار و300 سيارة للشرطة إلى جانب عدد من الصفقات ما بين رجال الأعمال المصريين والصينيين بقيمة خمسة مليارات دولار .. 

حاجه زي كده مكنتش بتتقال أيام النظام القديم ولا أثناء زيارات مبارك لدول العالم .. يمكن عشان مبارك أصلاً مكنش بيجيلبنا حاجه وهو جي ولا حتى كان بيفتكرنا بشوية يوســتــفندي ..

 قعد تلاتين سنه في الحكم لف فيهم الكوكب سبعتاشر مرة وفي كل مرة ينزلنا من الطيارة ايد ورا وايد قدام ومش فالح غير في انه يبوس ويحضن في الخمسين واحد اللي مستنيينه قدام باب الطيارة ..

 محدش كان بيطلع يقولنا عمل ايه ولا سوا ايه ولا قعد مع مين ولا نعرفش احنا كمواطنين استفدنا ايه من الزيارات دي .. ده حتى كان فيه فترة – أعتقد إنها كانت في أواخر حكمه – كان مبارك بيقعد فيها مع جنسيات غريبة جداً من دول عجيبة جداً ما أنزل الله بها من سلطان .. وزير دفاع جورجيا .. وزيرة الصحة الأوكرانية .. وزير خارجية موريشيوس .. 

المتحدث الرسمي بأسم رئاسة جزر القمر .. سفير بنسلفانيا في أوزباكستان .. ودول ملهاش ايميلات ولا موقع عالانترنت ومعرفش وصلها ازاي .. و البيان الوحيد اللي كانت بتقوله مؤسسة الرئاسة المباركية على مدى ثلاثين عاماً بعد أي اجتماع هو بوء واحد مبيتغيرش ..

" وقد عقد سيادة الرئيس محمد حسني مبارك اجتماعاً مع فولان الفولاني رئيس الدوله العلانية من أجل ..

(((( خد بالك انت بقى من الجملة اللي جايه دي))))) .....

بحث سبل التعاون بين البلدين" ..

بس كده ..

تحاول انت بقى تفهم ايه هي  "سبل التعاون" دي ولا عبارة عن إيه ولا فايدتها إيه لينا كمواطنين غلابة بنجري على أكل عيشنا من صباحية ربنا متقدرش تعرف ... والمصيبة إنه مبارك بقاله 30 سنه بــيــبحث في سبل التعاون!! ..بـــيــبحث !! ... طب هتبتدي تتعاون إمتي متعرفش برضه!!! ..

لا حول ولا قوة إلا بالله ..