دين الثورة

في دين الدولة أنا ملعون
و كمان عيل طايش أو مجنون
بس في دين الثورة
أنا أقرب واحد م الملكوت
تسابيحي هتاف
و الآمي سكوت
و الورد بمولوتوف
و اتعطر بالغاز
و الخرطوش
و الاوليا كتار
مايتعدوش
و الحج في ميدان التحرير
و ركعتين في محمد محمود
بمقام ثورة
أصل محمد محمود هوا الثورة
عندنا بقي في الثورة
لما نموت بنعيش
و بنفرح أوي بالزفة
أصل الجنة عندنا بحري
ترد الروح
و لما بننزل بنشيل علي الاكتاف الروح
و محدش بيبات مش مجروح
اصل الحزن في ديننا عبادة
و بنفرح أوي لما نخش السجن
أصلها عادة
لازم لجل تثور
انك تمضي حضور
عند المأمور
و انك دايما شايف نور
وسط  العتمة
و إن تلمس بإديك أوهامك
و إنك ضد الخنقة
ضد الكتمة
و انك عايش في براحك
و إن كاره قعدة مع ناس إتمة
و انك مهما عافرت عارف إنك مش عنتيل
أصل الشهدا مقامهم عالي كتير
و إنك عايش أصلا ميت
و إنك بتحب تعيش للموت
عشان كده.انت قريب للملكوت.
#دين_الثورة
#طارقيات